காற்றின் இன்ப சலிப்பு!

கிருஷ்ணா! உனக்கென்ன?
என் கஷ்டம் உனக்கெப்படி  புரியும்?

உன் குழல் இசையை என்னுள் மிதக்கவிட்டாய்!
கூடியுள்ள கோபியரின் காதில் படாமல்
ராதையிடம் உன் இசையைச் சேர்க்க
நான் படும் பாடு உனக்கென்ன தெரியும்?

உன் காதலுடன் கூடின மூச்சுக்காற்றை
என்னுள் பரவவிட்டாய்!
உனக்காக வாடும் கோபியரின் உடலில்
படா வண்ணம் ராதையிடம் சேர்க்க
நான் படும் பாடு உனக்கென்ன தெரியும்?

ராதை கோபமுடன் இருக்கிறாள்!
உண்ணுவதும் உறங்குவதும் மறந்தாளாம்!
நீ சில நொடிகளில் வரவில்லை என்றால்
தன உயிர் மாய்ப்பாளாம்!!

கிருஷ்ணா! என்னுடன் வந்துவிடு!
எவர் கண்ணிலும் படாமல்
ராதையிடம் சேர்க்கும் உபாயம்
எனக்கு மட்டும் தான் தெரியும்!

உங்கள் இருவரிடமும் தினம் தினம்
நான் படும் பாடு உனக்கென்ன தெரியும்??!!